Iarratas a dhéanamh ar scaoileadh iomlán cistí
Nuair a bhíonn duine faoi ocht mbliana déag d'aois ar bronnadh airgead air i gcás díobhála pearsanta ocht mbliana déag slánaithe aige, is féidir leis rochtain a fháil ar an airgead. Chun é sin a dhéanamh, ní mór dó iarratas a dhéanamh chuig oifig na gcuntasóirí sa chúirt.
Iarratas a dhéanamh chuig Cuntasóir na gCúirteanna Breithiúnais
Nuair a bheidh ocht mbliana déag slánaithe ag an duine, is féidir leis iarratas a dhéanamh go díreach chuig oifig na gcuntasóirí.
Is féidir iarratas a dhéanamh chuig oifig na gcuntasóirí ar dhá bhealach:
- Is féidir leat, mar dhuine fásta anois, iarratas a dhéanamh go díreach chuig oifig na gcuntasóirí. Ní mór duit foirm iarratais phearsanta a chomhlánú. Níl aon táille i gceist chun an t-iarratas seo a dhéanamh.
- Is féidir le haturnae iarratas a dhéanamh ar do shon trí mhionnscríbhinn agus an bunteastas breithe a chur san áireamh.
Ní mór an t-ainm ar an iarratas a bheith ag teacht leis an ainm ar an ordú cúirte agus ar an teastas breithe. Mura dtagann siad le chéile, beidh ort iarratas a dhéanamh chun na cúirte chun an t-ainm a leasú. Beidh costais bhreise i gceist leis sin.
Nuair a bheidh an t-iarratas comhlánaithe ina iomláine agat agus gach doiciméad ar an seicliosta curtha san áireamh agat, beidh ort an fhoirm a shíniú os comhair finné.
Tuilleadh eolais faoi Chuntasóir na gCúirteanna Breithiúnais >
Ní mór duit an t-iarratas a sheoladh ar ais tríd an bpost chuig:
An tSeirbhís Chúirteanna, Oifig an Chuntasóra, 3ú hUrlár, Teach an Fhionnuisce, 15/24 Sráid an Fhionnuisce, Margadh na Feirme Thuaidh, Baile Átha Cliath 7.
Nuair a fhaigheann oifig an chuntasóra d'iarratas agus do dhoiciméid chomhlánaithe, próiseálfaidh siad d'iarratas agus scaoilfidh siad do chistí.
Iarratas a dhéanamh ar pháirtíocaíocht cistí
Is féidir leis an 'neaschara' nó le haturnae iarratas a dhéanamh ar an gcúirt chun cistí atá á gcoinneáil do dhuine faoi bhun ocht mbliana déag d'aois a scaoileadh go páirteach. Is féidir é seo a dhéanamh nuair a chríochnaíonn an cás cúirte agus sula n-iompaíonn an mionaoiseach ocht mbliana déag d'aois. De ghnáth ní cheadaíonn an chúirt na híocaíochtaí seo ach le haghaidh caiteachais thar ghnáthchostais laethúla.
Iarratas a dhéanamh chuig an gcúirt dúiche agus chuig an gcúirt chuarda ar pháirtíocaíocht
Ní mór don 'neaschara' iarratas ex-parte a chomhdú agus mionnscríbhinn a mhionnú in oifig na cúirte. Leagtar amach sa mhionnscríbhinn faoi mhionn na cúiseanna le hiarratas a dhéanamh ar chistí a scaoileadh go luath.
Tá táille €15 ann chun d'iarratas a chur isteach sa Chúirt Dúiche agus is é €60 an táille chun d'iarratas a chur isteach sa Chúirt Chuarda.
Cuirfidh oifig na cúirte in iúl duit cén uair a éistfear le d'iarratas. Freastalóidh tú ar an gcúirt ar an dáta seo agus éistfidh an breitheamh leis na cúiseanna le cistí a tharraingt siar. Má aontaíonn an breitheamh leis an iarratas, cuirfidh oifig na cúirte an t-ordú ar aghaidh chuig oifig chuntasóir na gcúirteanna agus scaoilfidh siad na cistí chugat mar atá leagtha amach san ordú cúirte.
Iarratas a dhéanamh chuig an Ard-Chúirt ar pháirtíocaíocht
Ní mór don 'neaschara' teagmháil a dhéanamh le Príomh-Oifig na hArd-Chúirte trí ríomhphost a sheoladh chuig [email protected]. Seolfaidh an phríomhoifig an fhoirm a chaithfidh siad a chomhlánú agus a sheoladh ar ais chuig an oifig.
Déanfaidh an Máistir nó an Leas-Mháistir athbhreithniú ar d'iarratas agus déanfaidh sé cinneadh maidir le cistí a scaoileadh nó gan iad a scaoileadh. Má theastaíonn tuilleadh faisnéise, b'fhéidir go mbeidh ort freastal ar a n-oifig. Má aontaíonn siad leis an iarratas, cuirfidh oifig na cúirte an t-ordú ar aghaidh chuig oifig chuntasóir na gcúirteanna. Scaoilfidh siad na cistí chugat mar atá leagtha amach san ordú cúirte.
Táillí Aistarraingthe
D'fhéadfadh táille a bheith iníoctha leis an Státchiste le haghaidh cuid d'íocaíochtaí nó íocaíochtaí deiridh do chistí.
Má rinneadh do dhámhachtain san Ard-Chúirt, tá táille €1.15 in aghaidh an €100 i gceist (tá an chéad €100 díolmhaithe). Ní rachaidh an táille iomlán atá dlite thar €1,200. Bainfear é seo ó do dhámhachtain ag oifig an chuntasóra. Má rinneadh do dhámhachtain sa chúirt dúiche nó sa chúirt chuarda, níl aon táille iníoctha.
Le haghaidh tuilleadh faisnéise, is féidir leat teagmháil a dhéanamh le hoifig an chuntasóra sa chúirt.
